恃老賣老令人惱

保護老弱婦孺一向是社會的共識,而四者之中的「老」在受保護之餘更要得人尊敬, 是故我們還多了一樣叫「敬老」的美德。

只是眼下香港地很多的老人家,其年紀只代表心臟病高血壓糖尿病或是骨質疏鬆,卻未能成為贏取他人尊敬的指標。恃老賣老,仗著自己老態龍鐘而撒野鬧事的渾球實在太多了。


早陣子的某個工作天,占占乘午飯時間往銀行辦點私務。眾所周知,午飯時間光顧銀行絕對是自討苦吃,奈何占占要辦的事非得親身往分行一趟不行。乾等了差不多二十分鐘,終於排到前列,後面尾隨的少說也有六七個人。這時不知從那裡鑽了一個老頭出來,二話不說的佔據龍頭位置,令人為之側目。

最沉不住氣的占占率先發難: 「阿伯,你唔該排返去後面呀,好多人排緊隊呀!」

「我唔係打尖呀! 頭先有個阿婆幫我排定架,不過唔知去左邊之嘛。」阿婆?為甚麼我呆站了差不多半句鐘也看不到?

「咁你講乜都得啦,你話曾蔭權幫你o係前面排定隊都得啦。」

有占占當爛頭卒,其他顧客馬上附和叫囂起來。若是年青人的話恐怕已經敗下陣來,但這等臭老頭的臉皮比Dopod838還要厚,一把年紀可不是白活的。

「睇唔出你咁後生,個人咁野蠻o既?」阿伯強調我年輕一截,暗嘲我欺負老人家。

「你係阿伯嘛,打尖大晒架啦!」

「你好啦下! 你係咪想打?」阿伯開始目露兇光了。

「阿伯打完尖仲想打人?你真係以為阿伯大晒?」

阿伯詞窮理虧,但他光顧銀行亦只為理財,於是一於視占占透明。事實上, 直斥其非只會對心虛者有效,對這種「我係咁架啦吹咩」的混蛋卻落得老鼠拉龜收場,占占難道毆打他一頓不成?而銀行為息事寧人,只會好言著我耐心等候,絕少會主持公道。無賴於是又勝一仗。

你道阿伯野蠻?原來阿婆撒野起來絕對有過之而無不及。

占占剛剛往筲箕灣午膳,乘小巴回辦工大樓,才剛在車上坐下,便見一個阿婆打尖衝上小巴,司機當面斥之,誰知阿婆厲言反駁:

「咩呀?! 我先係排第一果個呀,係d人唔知排左隔離條隊之嘛,我果個先至係個牌o既位呀! 你仲好講,架車仲要唔係停正我面前,我隻腳又痛@$!@#%$!…」 司機哥哥馬上投降,車上乘客莫不搖頭。老占以前遇到有人插隊上車也會直斥其非,但領教過這些公公婆婆的無賴手段,我也懶得自找麻煩了。阿婆發茅起來絕對萬夫莫敵,占占曾見過一對不相識的公公婆婆在地鐵上爭坐位,阿伯不敵,而阿婆則大聲叫囂,嚷著是其他乘客特意讓座 (其實別人只是到站下車)給她,阿婆就坐之後還不斷向對方咒罵,結果逼得阿伯落方而逃…

公公婆婆知否「敬老」並非必然?香港人普遍文明有禮,才會對非親非故的你們必恭必敬。到一天我們的尊敬心怠盡了,你們行動不便要過馬路沒有人幫,你們拿著重物腳步蹣跚沒有人幫,你們在地鐵上站得酸了沒有人讓座,會是何等凄涼? 活了大半世人,若連禮貌風度也隨鈣質一併流失,豈不丟人現眼?

Advertisements
30 comments
  1. Jacky said:

    有D公公婆婆真係好混漲, 唔好話唔禮讓, 有D真係讓左比佢仲好似係欠左佢咁眼超超 ~_~

    不過話說回來, 有時有D真係值得讓的人, 如大肚婆咁, 但HK而家又有幾他”善心人”呢?

  2. 不過話說回來, 有時有D真係值得讓的人, 如大肚婆咁, 但HK而家又有幾他”善心人”呢?

    大肚婆算是比較好的了,占嫂腹大便便期間,乘MTR時屢獲善心人讓座 (但也試過有人讓座卻被阿婆攔路照搶,後來看見占嫂的大肚子才倖倖然的說「乜原來你都要坐架」,媽的 ~_~)。曾有研究指出香港的讓座風氣不算太差,甚至比日本還要好。

    就算是昂藏七呎如占占,試過以帶抱著思澄上街,一副帶子洪郎的模樣也令不少人讓座予我呢~~~ XDDD

  3. Silver said:

    曾有研究指出香港的讓座風氣不算太差,甚至比日本還要好。

    小銀每天坐地鐵出入,也覺得慷慨讓座的人舉目皆是(雖然爭先恐後的也有不少)

    恃老賣老令人憎,但小銀至今未有機會一嘗「大反擊」的滋味。還記得有次和朋友在時代廣場搭升降機,上到某層,門一開,幾個老人魚貫湧入,行動之粗魯直有「逼爆」之勢,更置我們勸喻於不理。朋友忍不住吐了句:「如果我第時老來都係咁就該煨囉!」

    結果?阿公阿婆一於繼續裝聾。如占占所說:「直斥其非只會對心虛者有效。」

  4. 天佑 said:

    我都最討厭那些恃老賣老的人。

  5. 脂肪 said:

    持老賣老真係好討厭,只不過,同d阿伯仲可以學占占咁嘈下,但阿婆真係無得玩,佢一大喊大叫真係企係度,更甚既,係旁人永遠只會叫你讓下佢。其實讓一讓無問題,但佢明明持老賣老,讓得唔順氣,呢個先係問題。不過,絶大部分情況下,都只可以忍氣吞聲,或者加多句,「希望我老左唔會咁樣」囉

    講到讓座。孕婦一定讓,但一D男士抱住小朋友,我就唔會讓,因為我總覺得男士會有力。

    另外,讓座方面,小弟都有D怪癖,中途上車既公公婆婆,如果有需要既,讓坐無問題。但係由總站開出既巴士,地鐵,即使有老人家,小弟都唔會讓坐。原因係,幾十歲人,唔應該再趕時間啦,要位既可以等下一架或下一班,咁一定有位,點解一定要上呢架車再要人讓位?如果堅持要上車而無位既,咁就要企下啦。但如果係孕婦係總站上車,我反而會讓座喎XDXDXD

  6. 另外,讓座方面,小弟都有D怪癖,中途上車既公公婆婆,如果有需要既,讓坐無問題。但係由總站開出既巴士,地鐵,即使有老人家,小弟都唔會讓坐。原因係,幾十歲人,唔應該再趕時間啦,要位既可以等下一架或下一班,咁一定有位,點解一定要上呢架車再要人讓位?如果堅持要上車而無位既,咁就要企下啦。但如果係孕婦係總站上車,我反而會讓座喎XDXDXD

    脂男這種究竟是那門子的邏輯? XDDD

  7. 523 said:

    講開又講, 上次番香港時見到既一d觀察真係令我有d同感..

    回想起小學時睇教育電視, 兩個小學生坐響小巴上面討論, 然後讓座俾兩位老人家, 最後四人齊齊討論社會風氣問題…

    大家老來都要記得, 面係人地俾…

  8. Cable said:

    Cable有位好孝順o既朋友。好多次同佢一齊,遇到老人插隊,佢都大方相讓。我自己就唔會咁,因為好多「亂入」o既亞伯直頭壯健到不得了,駛鬼讓佢!最重要係,讓你都唔好當老奉先得架!Cable尤其討厭地鐵衝門果D勇士,我唔會學老占咁「直斥其非」,而係「我行我素當佢無到」,睇下邊個撞底邊個!

  9. Silver said:

    脂男這種究竟是那門子的邏輯? XDDD

    係囉,人地響邊個站上車同脂男讓唔讓座又有關係?XD

    響總站定中途站等車都係一樣咁企架啦,無理由後者辛苦d…… -_-

  10. Oscar said:

    就係因為有d 0既老野﹗所以我做義工都一定唔做老人服務個d………
    記得去年有一次搭丁丁,大約係6幾放工時間
    去到灣仔298對開,有一個呀伯由西行線過馬路去東行線
    軒尼斯道東西行車線加上電車線,共七條線,呀伯勇者無懼,直行直過,行到一半有車boot 佢﹗點知就聽到e位呀伯中氣十足甘話「boot 咩呀?你見唔到我行緊嫁啦咩?boot 你xx 個x 呀?知唔x 知麥x 野叫敬老呀?」
    之后繼續行﹗

  11. 知唔x 知麥x 野叫敬老呀?

    一車顏過去,等人地年年清明重陽慢慢尊敬飽你啦!

  12. Oscar said:

    甘送佢一程,未搵自己笨﹗

  13. 脂肪 said:

    我都唔知自己咩邏輯架,快d幫幫手拆解下啦,等我可以總站上車既老人家都可以讓位啦。XDXDXD

    其實我心底係有種想法,就係有D老人家明知架車滿,都要上車,再要人讓坐(唔好意思,我呢D人渣係會咁樣諗野,或者係一竹篙打一船人XDXDXD)

    坦白,我都遇到過呢D咁既長者。明知架車無位,於是乎仲要上車,跟住係我附近自言自語﹕「點解無位架?」,但我既解讀會係﹕「點解無人讓座俾我」?

    老實,架車講緊3幾分鐘一班,走左一架,等下一架好花時間?

    仲有,點解我要讓座俾老人?其一係,後生仔好氣好力,企耐D都理論上無老人家咁易疲倦。但呢個只係表面原因,最重要既係,行車時仲有顛簸一點,我係怕D老人家扶唔穩會跌,大家都知,同樣係跌親,老人家跌親會俾後生既大鑊得多,呢個先係我讓座既主要原因。

    咁問題係,佢企係站頭等車,穩穩陣陣,有乜問題?而且就算企,都係企3幾分鐘,就一定有位。咁點解要讓先?但中途上車就唔同,因為唔一定有位座,等下一班車都未必有位坐,係呢個情況下,我會讓座。

  14. 咁問題係,佢企係站頭等車,穩穩陣陣,有乜問題?而且就算企,都係企3幾分鐘,就一定有位。咁點解要讓先?但中途上車就唔同,因為唔一定有位座,等下一班車都未必有位坐,係呢個情況下,我會讓座。

    阿伯o係柴灣上車,趕住出去輪平安米,遲多斑車就趕唔切,於是無位都唯有照上。

    即刻咁你都唔讓架喇~~? XDDD

    別介意,我也覺得不一定要讓位給老人家,要看個別情況而定。

  15. 脂肪 said:

    絶對唔會介意啦,如果我係想歪左既,大家可以糾正下我。:)

    我明白我個講法係假使左「老人家唔趕」。

    第一﹕我會覺得老人家會係最唔趕既一群,老實,無左包平安米,有乜影響?如果包米可以為長者節省多好多開支,咁係唔係反應長者唔夠駛?生活有困難可以申請綜援,俾長者既綜援唔夠駛?加多D長者綜援金又點話?何況大熱天時仲要老人家趕包平安米,真係令人心酸。

    第二,呢方面我會不近人情,如果要趕車,即係就遲到或時間預得唔好啦,莫非要因為佢趕唔切,所以我要讓座俾佢?講唔通喎,趕唔切等行為,責任自負啦。

  16. Silver said:

    我想問脂男o既問題好簡單:響呢個話題上,總站同中途站o既分別係乜?點解響總站上車o既老人會無咁趕時間?

    我對讓座與否無任何批判,只係純粹討論邏輯問題 😛

  17. 脂肪 said:

    1)總站上車,基本上空車,中途站未必一定空車。

    2)趕時間呢個PT同第1點相關。因為總站等下班車基本上一定有位,中途站等下一班車未必有位。

    3)讓座與否同有座無位有關

  18. Silver said:

    2)趕時間呢個PT同第1點相關。因為總站等下班車基本上一定有位,中途站等下一班車未必有位。

    呢個正係我o既中心問題,但你答完我都係唔明。我睇唔出有無位同趕唔趕時間有任何關係。

    不過算啦,你假設老人家唔趕時間已經係好有問題架喇~~ 😛

  19. 脂肪 said:

    我係有問題架:P

    不過係借左占占個BLOG來講XDXDXD

    其實,我都拆解到自己錯既地方,就係老人家趕時間既問題,但仲係改唔到。

    一方面原因,係有d唔好既經驗,特別某恃老賣老既長者,明明可以花三幾分鐘等多班車就可以,偏偏都要上車,再博人地讓座,咁樣俾佢影響啦。

    第二,個人想法,總認為老人,特別係退休生活,應該亦都可以慢一點。請讓我強調,可以「慢」,可以唔趕,絶對係好事。特別生活已經好匆忙,可以唔駛趕,會是多麼的好?

    再換轉一個講法,如果到老,我仲要趕時間,我會覺得「該煨」囉XDXDXDXD

    當然,我係唔應該咁樣投射自己觀點落其他人度。但我可以保證,如果我有機會老(可能我未到老就瓜柴,亦都唔應該假設自己一定可以老XDXDXD),我係總站等車,無位我一定等下一架,唔會出現要人係總站就要讓座俾我既情況:P

  20. 我都係唔明G男o既邏輯…. -_-

    算啦,我o係MTR見到你的話,就算你未係七老八十我都會讓座俾你架~~~ XDDDD

  21. 脂肪 said:

    我呢d怪癖..無邏輯可言,無得明架啦XDXDXDXD

    不過,搭地鐵我好少坐,我總覺得,企得是福XDXDXD

  22. 子麟 said:

    脂式邏輯,奇詭莫名,非常人所能猜度也。

    其實讓坐與否,在乎愛心:當遇到有需要的人時,你給他們讓坐,正正是體現了當中的人道精神;但當中亦貴乎真心,若讓坐只因屈服於社會壓力,那又有什麼意義可言?

  23. TiNTiN said:

    講開又講,香港島那邊的人比較好禮貌~
    小弟由港島搬到新界已7年,在KCRC所見的讓座情況真的絕無僅有。
    另一樣是KCRC的人十分喜歡爭先恐後。在排隊上火車時,明明我已排首位,但每次都總會有人在開門前一刻由側邊打尖排你前面。自此之後我必定排最後。

    呢個情況廿幾年前已發生~
    我老豆就係因為 “香港島人” 搭車會排隊所以由九龍搬去香港島~ 😀

  24. 歡迎田田光臨寒blog~~ 🙂

    其實別說KCR,就是MTR的九龍東線(太子至油塘)與港島線相比已經是兩個光景了… -_-

    占爸占媽不時會往廣州去消遣,聽他們說那邊地鐵的讓座風氣相當不錯,甚至比香港還要好呢!

  25. Silver said:

    講開又講,香港島那邊的人比較好禮貌~

    同意,呢樣野我覺左好多年,不過平日唔會隨便同人講,因為怕得罪人~ 😛

  26. 脂肪 said:

    小弟雖然係新界人,但亦都認同港島人士的禮貌好一點。

    若果以地鐵計、黃大仙、深水步上車的人,禮貌普遍較差。

    以往長沙灣也差,但近兩三年好了一點,可能是該區陸續推出一些吸引中產人士入住的樓宇有關。

    說出來或會惹起部分人士不高興,但奈何真的有這樣的一個印象。

    但住在港島區負擔太重,非小弟可以負擔:P

  27. 緣武 said:

    我都試過俾阿婆打尖,仲要打之前食咗佢一踭,真係惡到呢~~!

  28. 澄媽快要誕下第二胎了,占占和她一起乘港鐵,深感讓坐的風氣愈來愈差;兩年前澄媽十次乘車起碼有七次獲有心人讓坐,今天?人家只會當你透明。

    就像剛剛和澄媽一起回家,還有不足一個月便臨盆的太太由金鐘站至側魚涌,前面三位不會大得過占占的婆娘大刺刺地坐得心安理得,有無搞錯?!

    站在一旁看得光火的占占,差點就想舉起手上那本厚過一吋的Gundam Ace一手車過去,叫她們記起甚麼叫做”公德心”。

  29. 天佑 said:

    老占:為何不發新文,在舊文留言便算? 😛 下次見到同類人車她們吧。 XDDD

  30. 為何不發新文,在舊文留言便算?

    打緊新文,好快就有 😛

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: